rbu ត្រពាំងថ្លុកស្រែកេរម៉ែអូន

១. ស្រែអើយស្រូវខ្ញុំ សុំរស់ក្បែរ
ត្រពាំងថ្លុកស្រែ ក្បែរទួលស្រី
ស្រះកេរម៉ែអូន សំបូរត្រី
ទឹកថ្លាអ្វីៗ ឃើញឆ្លុះមេឃ។

២. ត្រីឆ្លាំងឆ្លាស់ឆ្លៀត ជ្រៀតសំងំ
ឆ្លូញស្លាតបន្លំ សង្វាតពេក
លូកលលោមលួង ល្បួងមន្តសេក
ចង់ស្រីរូបឯក លោមបន្លែង។

៣. ត្រីព្រួលត្រីប្រា ឆ្លេឆ្លាហែល
កៀងគ្នាក្រវែល ជុំគុម្ពត្រែង
ត្រីក្រុះកញ្ចុះ ក្អែកអណ្ដែង
ត្រីក្រាញ់បន្លែង នឹងត្រីផ្ទក់។

៤. ឱ ដួងច័ន្ទ្រអើយ អូនដឹងទេ
សម្រស់មាសមេ ឲ្យបងឈ្លក់
វង្វេងទាំងថ្ងៃ អង្គុយងក់
ស៊ូលក់កេរឪ ដើម្បីអូន។

៥. គន់មើលស្លឹកស្រូវ ដូចកេសា
ស្រស់កែវជីវា លូតស្រលូន
វល្លិមាសរលាស់ សមភ័ក្ត្រអូន
សោភ័ណដូចកូន ព្រះឥន្ទ្រា។

៦. កន្ទុំរុយរេ ហើររាំ-វង់
ត្រចៀកកាំពង់ ព័ទ្ធវង់គ្នា
បណ្ដាក់ជូនពរ ពៅពម្ងា
ធ្វើបរិពារ វេនរំលែក។

៧. ឃើញដួងច័ន្ទ្រអូន លើវេហាស៍
ឆ្លុះយល់ភក្ត្រា ច្បាស់នឹងភ្នែក
មុជស្រះស្រង់អូន ដូចឈោងមេឃ
បង្កើយជិតពេក លួចបេតី។

៨. ពពកសក្បុស ឆ្លុះមេឃយប់
ទោះងងឹតឈ្លប់ ដូចភ័ក្ត្រស្រី
ពេញមូលក្រឡង់ ចាំងរង្សី
ដូចច័ន្ទ្របូរមី ត្រចះចែង ។

៩. ទួលស្រីប្រណី ស្និទ្ធបបុស
បបូរត្រសុស ត្រដុសត្រែង
ឲ្យបងទុក្ខធំ ខ្វល់ចំបែង
កម្សត់ម្នាក់ឯង ស្នេហ៍ពន់ពេក។

១០. សូមមានវាសនា បានទៅកើត
កង្កែបថ្លុកអើត ងើយមើលមេឃ
ប្រឡង់ភ័ក្ត្រអូន ពន្លឺភ្នែក
ដូចពេជ្រភ្លឺផ្លេក ដេញរស្មី។

១១. ក្នុងត្រពាំងស្រែ កេរម៉ែអូន
ម៉ែពុកចែកកូន ស្ងួនពិសី
តាមពង្សតពូជ រួមមេត្រី
សូមកល្យាណី ស្រីមេត្តា៕

© rbu_spp June 19, 2014 Sao Puthpong សៅរ៍ ពុធពង្ស

LikeLi