បក្សពីរទីអាងរូបផ្សេងគ្នា
មួយរូបសុរិយារះព្រឹកព្រាង
មួយទៀតទេវតាបាចផ្កាតាង
សំអាងរៀងខ្លួនជាអ្នកឈ្នះ។
ខាងរូបទេវតាស្រែកថានែ
នៅតែមួយខែអាទិត្យព្រះ
លិចបាត់ស្រមោលលែងងើបរះ
ដំណៀលចង់ឈ្នះបង្អាប់គ្នា។
ខាងព្រះអាទិត្យឆ្លើយតបខ្មី
នៅលើលោកិយទាំងទេវតា
គង់តែមិនអាចគ្មានសុរិយា
អត់ថ្ងៃកាលណាទេវតាក្ស័យ។
ព្រះអាទិត្យប្រាប់ទៅទេវតា
អ្នកដឹងទេថារាស្ត្រសព្វថ្ងៃ
ស្គាល់មុខទេវតាកុំកាឡៃ
ប្រែឆ្នៃមុខចោរដើរបោករាស្ត្រ។
អ្នកខាងទេវតាស្រែកក្ដែងៗ
ព្រះអាទិត្យឯងកុំពោលផ្ដាស
ទេវតាពឹងយួនមកបោសច្រាស
ជម្រះផ្ទះឯងដេញប៉ុលពត។
ខាងព្រះអាទិត្យយិតវិញប្រាវ
ទេវតាពាក់អាវមួយរហូត
មិនដែលឃើញដោះទោះរបូត
ប្រឡាក់ស្អុយម៉ូត្ររាស្ត្របោះដូរ។
ទេវតាស្រែកតបខ្លាចបាតុកម្ម
លើករឿងចំណាំតាមខ្លួនបូរ
បាច់បកបរិយាយយ៉ាងហែហូរ
កុំដូរទេវតាខ្លាចសង្គ្រាម។
ព្រះអាទិត្យបើកចក្ខុមើល
ថាទេវតាព្រើលចូលចិត្តឈាម
ប្រតិដ្ឋរឿងក្លែងស្រែកគម្រាម
បង្ក្រាបរាស្ត្រភ្លាមហាមតវ៉ា។
......................................
ស្ដាប់មើលរឿងនេះពីរោះទេ
ពាក្យដៀលស្រែកជេរខ្មែរឈ្លោះគ្នា
មួយថាច្បាប់មានមិនត្រូវការ
ឲ្យមានកម្មការឯករាជទេ។
ទេវតាថាខ្លួនមិនចុះចាញ់
ព្រោះអីបក្សអញឈ្នះលើគេ
ឲ្យអញចុះចេញមិនចុះទេ
មើលនែរថក្រោះកាំភ្លើងពេញ។
មួយថាខ្លាចអ្វីបើខ្លួនឈ្នះ
មើលរាស្ត្រគ្រប់ផ្ទះទារកន្ទេញ
ព្រះអាទិត្យទាររាប់ឡើងវិញ
ឲ្យឃើញខ្មៅសជាការពិត។
បើអ្នកណាឈ្នះបានកិត្តិយស
ឯអ្នកចាញ់នោះគ្នាអស់ចិត្ត
ធ្វើតែប៉ុណ្ណឹងដឹងថាឥត
អ្វីពិបាកគិតស្រួលដោះស្រាយ។
បើចង់ដោះស្រាយត្រូវលះពុត
កុំប្រើអាវុធនាំអន្តរាយ
យកកញ្ចប់ ក មកបើកស្រាយ
តែប៉ុន្មានថ្ងៃដោះស្រាយបាន។
កុំប្រើកាំភ្លើងមិនល្អទេ
បាញ់រាស្ត្រនាំគេថ្កោលសាមាន្យ
ចរចាគ្នាទៅដោះស្រាយបាន
ជាតិខ្មែរប្រែថ្កានឈប់ឈ្លោះគ្នា៕
-
